Milli Bankın İdarə Heyətinin sədri Elman Rüstəmov Azərbaycanda səfərdə olan Beynəlxalq Valyuta Fondunun (BVF) Azərbaycan üzrə missiyasının rəhbəri Vitali Kramarenkonun başçılıq etdiyi nümayəndə heyətini qəbul etmişdir. Görüşdə ölkəmizdəki son makroiqtisadi proseslər, 2007-ci il üzrə perspektivlər, inflyasiya hədəfi, manatla pul bazasının hədəf trayektoriyaları, məzənnə və faiz dərəcələri, monetar siyasətin əsas məqsədləri, bank sisteminin sağlamlıq göstəriciləri, Azərbaycan Beynəlxalq Bankı və Kapital Bankın özəlləşdirilməsi, BVF-nin texniki yardımları və gələcəkdə texniki yardım ehtiyacları və digər prioritet məsələlər müzakirə olunmuşdur. Nümayəndə heyəti həmçinin Milli Bankın departament direktorları ilə görüşmüş və bank sektorunun müxtəlif aspektləri üzrə məsələləri müzakirə etmişlər. Yekunda hakimiyyət orqanlarının fiskal siyasətlə bağlı niyyətlərinin makroiqtisadi göstəricilərə təsiri ilə bağlı missiyanın nəticələri barədə fikir mübadiləsi aparılmışdır.