Ödəniş sistemi infrastrukturunda tətbiq olunmaq üçün hazırlanmış QR Code standartları

Tez-tez verilən suallar

QR Code nədir və təqdim olunan QR Code standartları hansı məqsədlərlə istifadə oluna bilər?

QR (Quick Responce) Code informasiyanın ISO 18004 standartı əsasında 2 ölçülü ştrix-kod şəklində təsvir olunmuş formasıdır. QR Code üzrə təqdim olunan bu standartlar ödəniş əməliyyatlarının aparılması zamanı zəruri rekvizitlərin proqram təminatları və qurğulardan istifadə olunmaqla oxunması məqsədi ilə tərtib edilmişdir.

Azərbaycanda QR Code üzrə standartların yaradılması nə üçün zəruridir?

“2018–2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı”nın əsas hədəflərindən biri də kiçik təsərrüfat subyektlərinə nağdsız ödənişlərin qəbul edilməsi imkanı verən QR Code kimi ucuz ödəniş üsullarının təqdim edilməsindən ibarətdir. Milli Ödəniş Sistemi infrastrukturuna inteqrasiya olunmuş bankların və digər xidmət təchizatçılarının bu istiqamətdə fəaliyyətinin tənzimlənməsi üçün qeyd olunan standartların yaradılması zəruridir.

QR Code standartından kimlər istifadə edə bilər?

QR Code standartlarından banklar, milli poçt operatoru, ödəniş xidməti təchizatçıları, kart prosessinq mərkəzləri, nəzarət-kassa aparatlarının operatorları, kütləvi xidmət müəssisələri istifadə edə bilərlər.

QR Code standartları hazırlanarkən hansı mənbələrdən istifadə edilmişdir?

Təqdim olunan QR Code standartları hazırlanarkən beynəlxalq təcrübədə geniş tətbiq olunan EMV® QR Code Standartından istifadə olunmuşdur. Qeyd olunan mənbənin tövsiyyələri nəzərə alınmaqla fiziki şəxslər və təsərrüfat subyektləri üzrə standartlar ayrı sənəd şəklində hazırlanmışdır.

• Fiziki şəxslər üçün nəzərdə tutulan standart əsasında yaradılan QR Code müştərinin mobil cihazında yaradılmaqla cihazın ekranında nümayiş etdirilməli və qarşı tərəfin (fiziki şəxs və ya təsərrüfat subyekti) həmin kodu QR Code oxuducusu ilə oxutması əsasında ödəniş tranzaksiyası inisasiya edilməlidir
• Təsərrüfat subyektləri üçün nəzərdə tutulan standart əsasında yaradılan QR Code Təsərrüfat subyektinin qurğusunun (Kassa aparatı, mobil tətbiq, terminal və s.) ekranında və ya statik formada xüsusi lövhədə nümayiş etdirilməli və müştərinin mobil cihazı vasitəsi ilə həmin kodun oxudulması əsasında ödəniş tranzasksiyası inisasiya edilməlidir.

QR Code standartı üzrə təklif və iradları necə bildirmək olar?

Təqdim olunan QR Code standartları üzrə ilkin versiyanın təkmilləşdirilməsi üçün bu istiqamətdə yaranan sual, təklif və ya iradlar ips@cbar.az elektron poçt ünvanına göndərilə bilər.