966
Dünya Bankı
Azərbaycan Respublikası Dünya Bankı Qrupuna daxil olan beş quruma aşağıda qeyd olunan tarixlərdə üzv olmuşdur:
- Beynəlxalq Yenidənqurma və İnkişaf Bankı- 18 sentyabr 1992
- Çoxtərəfli İnvestisiya Zəmanətləri Agentliyi- 23 sentyabr 1992
- Beynəlxalq İnvestisiya Mübahisələrinin Həlli Mərkəzi- 18 oktyabr 1992
- Beynəlxalq İnkişaf Assosiasiyası- 31 mart 1995
- Beynəlxalq Maliyyə Korporasiyası- 11 oktyabr 1995
Azərbaycan Respublikası Mərkəzi Bankının sədri Dünya Bankında Azərbaycan üzrə müdirdir.
Azərbaycan Dünya Bankı ilə Ölkə Tərəfdaşlıq Çərçivəsi (ÖTÇ) üzrə əməkdaşlıq edir. ÖTÇ Azərbaycan Hökuməti tərəfindən müəyyən olunmuş ehtiyac və prioritetlərə əsaslanan tərəfdaşlıq planıdır. Ölkədə makroiqtisadi vəziyyətin təhlili, effektiv monetar siyasətin həyata keçirilməsi, eyni zamanda Dünya Bankı ilə birgə həyata keçirilən layihələrin müzakirə edilməsi məqsədilə Azərbaycanda səfərdə olan Dünya Bankının missiyası ilə Mərkəzi Bankın rəhbərliyinin mütəmadi görüşləri təşkil edilir və məsləhətləşmələr aparılır.
Mərkəzi Bank Dünya Bankı ilə əməkdaşlıq çərçivəsində müxtəlif layihələr həyata keçirir.
“Maliyyə Sektorunun Modernizasiyası 3” layihəsinin məqsədi Mərkəzi Bankın tənzimləyici və nəzarət bacarıqlarının gücləndirilməsindən ibarətdir. Layihə çərçivəsində maliyyə sektoruna nəzarət və tənzimlənməsinin gücləndirilməsi, dövlət maliyyə inklüzivliyi proqramının icrasına dəstək və maliyyə sektorunun monitorinqi istiqamətində məsləhət xidmətinin göstərilməsi nəzərdə tutulur.
“Daşınar əmlakın yüklülüyünə əsaslanan maliyyələşmə” layihəsinin məqsədi ölkədə kiçik və orta biznesin maliyyə əlçatanlığının yaxşılaşdırılmasına xidmət edəcək alternativ maliyyə alətlərinə dair Mərkəzi Bankın siyasət çərçivəsinin formalaşdırılması və realizasiyasından ibarətdir. Layihə çərçivəsində beynəlxalq təcrübənin öyrənilməsi, yerli bazarın potensialının qiymətləndirilməsi, hüquqi və requlyativ çərçivənin yaradılması istiqamətində məsləhət xidmətinin göstərilməsi nəzərdə tutulur.
Beynəlxalq Valyuta Fondu
Azərbaycan Beynəlxalq Valyuta Fonduna (BVF) 18 sentyabr 1992-ci ildə üzv olmuşdur. Azərbaycan Mərkəzi Bankının (AMB) Sədri BVF-də Azərbaycan üzrə əvəzedici müdirdir.
BVF tərəfindən Azərbaycana aşağıdakı proqramlar həyata keçirilmışdır:
- Yoxsulluğun azaldılması və iqtisadi inkişaf;
- Struktur quruculuğunun artırılması;
- Sistem dəyişikliyi;
- Əlavə maliyyələşmə proqramları
BVF-nin ekspertlərinin AMB-yə mütəmadi səfərləri təşkil edilir. Bu səfərlər zamanı qısa müddətdə inflyasiyanın səviyyəsini azaltmaq və orta müddətdə inflyasiya proqnozlarının sabitləşdirilməsi üçün Mərkəzi Bankın apardığı siyasətlər, məzənnə və faiz dərəcəsi siyasəti, müdaxilə və sterilizasiya, manatla pul bazasının artımı, valyuta ehtiyatlarının diversifikasiya planları və digər məsələlər barədə BVF ekspertləri ilə müzakirələr aparılır.
Asiya İnkişaf Bankı
Azərbaycan Respublikası Mərkəzi Bankı ilə Asiya İnkişaf Bankı arasında sıx əməkdaşlıq mövcuddur və bu əməkdaşlıq çərçivəsində müxtəlif layihələr həyata keçirilir.
“İnkişaf edən Asiyada kapital bazarının inkişafına və islahatlara dəstək” layihəsinin məqsədi Azərbaycan, Özbəkistan və Monqolustanda kapital bazarının inkişafı üzrə islahatların dəstəklənməsindən ibarətdir. Layihə çərçivəsində yerli kapital bazarının qiymətləndirilməsi və kapital bazarının inkişafı üzrə məlumatlılığın artırılması istiqamətində məsləhət xidmətinin göstərilməsi nəzərdə tutulur.
“Milli kredit reytinq agentliyinin yaradılması” layihəsinin məqsədi Azərbaycanda yerli kredit reytinq agentliyinin yaradılmasına dəstək göstərilməsindən ibarətdir. Layihə çərçivəsində beynəlxalq təcrübənin öyrənilməsi, hüquqi və tənzimləyici çərçivənin inkişaf etdirilməsi, nəzarət bacarıqlarının formalaşdırılması istiqamətində məsləhət xidmətinin göstərilməsi nəzərdə tutulur.
İsveçrənin İqtisadi Məsələlər üzrə Dövlət Katibliyi
İsveçrənin İqtisadi Məsələlər üzrə Dövlət Katibliyi (SECO) ilə Azərbaycan Respublikasının Mərkəzi Bankı arasında faydalı əməkdaşlıq əlaqələri 2002-ci ildə yaradılmış və bu əməkdaşlıq çərçivəsində real sektorun monitorinqi, maliyyə proqramlaşdırılması, menecerlik bacarıqlarının artırılması istiqamətində texniki yardım göstərilmişdir.
SECO ilə əməkdaşlıq "İkitərəfli texniki yardım və instusional quruculuq" (BCC) proqramı çərçivəsində davam etdirilir. Proqramın ikinci fazasının implementasiyası ilə bağlı Mərkəzi Bank və SECO arasında 2019-cu ildə Anlaşma Memorandumu imzalanmışdır. Proqram pul siyasəti analizi və implementasiyası, maliyyə sektorunun inkişafı, makroiqtisadi statistika və proqnozlaşdırma, əməliyyat risklərinin idarə edilməsi komponentləri üzrə texniki dəstəyi nəzərdə tuturdu.
Hazırda, SECO ilə əməkdaşlıq Proqramın üçüncü fazası çərçivəsində davam etdirilir. Proqramın məqsədi İnflyasiyadan Qorunan Qiymətli Kağızlarla (TIPS) əlaqəli istiqrazlara və digər qiymətli kağızlara investisiya qoymaq və imkanları inkişaf etdirmək üçün ilkin biliklərin ötürülməsi, eyni zamanda əsas məlumatlar əsasında mövsümi amillərdən təmizləmə prosedurunun yaradılmasındən ibarətdir. Proqram çərçivəsində TIPS ilə bağlı nəzəriyyə, ön, orta və arxa ofislər arasında idarəetmə və koordinasiya, investisiyaların idarə olunması təcrübəsi, mövsümi amillərdən təmizləmə prosedurunun yaradılması istiqamətində məsləhət xidmətinin göstərilməsi nəzərdə tutulur.