Ani Ödənişlər Sistemində bir alıcının ödəyicidən ödənişin başlamasını sorğu etməsinə imkan verən əməliyyat axını ödəniş sorğusu adlanır.

Ödəniş sorğusu ödəmə vasitəsi və ya ödəmə aləti olmamaqla, yalnız ödənişin başlanmasını tələb etmək üçün sorğulama funksiyasıdır.

Ani Ödənişlər Sistemində ödəniş sorğusu aşağıdakı formalarda ola bilər:

1. Bir şəxsin digərindən vəsait sorğulaması.
2. Xeyrinə ödəniş ediləcək təşkilat və ya təsərrüfat subyektləri tərəfindən vəsait sorğulanması.

Ödəniş sorğusu əsasında ödənişin reallaşdırılması üçün müştəri razılığının alınması mütləqdir. Hər bir sorğunun növündən asılı olaraq müəyyən müddət ərzində sorğu müştəri tərəfindən təsdiq və ya imtina olunmaqla cavablandırıla bilər. Bank ilə müştəri arasında əvvəldən olan razılığa əsasən, bu sorğular avtomatik qaydada da icra edilə bilər.

Köçürmə və ödəniş proseslərinin müxtəlifliyindən və mürəkkəbliyindən asılı olmayaraq prosesi aşağıdakı addımlara ayırmaq olar:

1. Ödəniş sorğusunun yaradılması və ödəyiciyə təqdim edilməsi.
2. Ödəniş sorğusunun ödəyici tərəfindən təsdiq və ya imtina olunması.
3. Ödəniş sorğusunun ödəyici tərəfindən təsdiq edildiyi təqdirdə ödənişin həyata keçirilməsi.