Emissiya prospekti və informasiya memorandumlarına dair şablon formalar

“Qiymətli kağızlar bazarı haqqında” Azərbaycan Respublikasının Qanununa (bundan sonra – Qanun) əsasən, investisiya qiymətli kağızlarının kütləvi təklifi və ya onların tənzimlənən bazarda ticarətə buraxılması zamanı emitent tərəfindən emissiya prospekti və ya informasiya memorandumu tərtib olunmalıdır.

Bu sənədlərin tərtib olunmasının əsas məqsədi investorların qərar vermə prosesində şəffaf və əhatəli məlumatla təmin edilməsidir. Emissiya prospektində və ya informasiya memorandumunda emitentin maliyyə vəziyyəti, buraxılan qiymətli kağızlar, onlar üzrə hüquqlar və risklər aydın, dəqiq və səlis şəkildə təqdim olunmalıdır.

Emitent bir il ərzində investisiya qiymətli kağızlarının bir neçə (səhm istisna olmaqla) buraxılışı haqqında qərar qəbul etdiyi təqdirdə, baza emissiya prospekti tərtib edə bilər. Qanunun emissiya prospektinə aid olan müddəaları baza prospektinə də şamil olunur.

Emissiya prospektinin əvəzinə aşağıdakı hallarda informasiya memorandumu tərtib edilir:

investisiya qiymətli kağızları, o cümlədən bu növ investisiya qiymətli kağızlarına hüquqlar qoşulan hüquqi şəxsin səhmdarlarına və ya payçılarına təklif edildikdə və onların arasında yerləşdirildikdə;
investisiya qiymətli kağızları, o cümlədən bu növ investisiya qiymətli kağızlarına hüquqlar ayrılan hüquqi şəxsin səhmdarlarına və ya payçılarına təklif edildikdə və onların arasında yerləşdirildikdə;
investisiya qiymətli kağızlarının buraxılış məbləği Mərkəzi Bankın müəyyən etdiyi məbləğdən az olduqda;
emitent tərəfindən bir təqvim ili ərzində buraxılan investisiya qiymətli kağızlarının məcmu nominal dəyəri Mərkəzi Bankın müəyyən etdiyi məbləğdən az olduqda;
institusional investorlara ünvanlanan təklif edildikdə.

Qanunun 5.6-cı maddəsinə əsasən aşağıdakı hallarda emitent emissiya prospektinin və informasiya memorandumunun tərtib edilməsindən azaddır:

dövlət və ya bələdiyyə, Azərbaycan Respublikasının üzv olduğu beynəlxalq təşkilatlar və ya Mərkəzi Bank tərəfindən investisiya qiymətli kağızları emissiya edildikdə;
dövlət zəmanəti ilə təmin edilən investisiya qiymətli kağızları emissiya edildikdə;
hər bir investor üçün təklif edilən investisiya qiymətli kağızlarının dəyəri Mərkəzi Bankın müəyyən etdiyi məbləğdən çox olduqda;
səhmdarlardan ödəniş tələb etməyən və dividendlərin ödənilməsi əvəzinə mövcud olan səhmlərlə eyni növdə buraxılan səhmlər emissiya edildikdə;
tənzimlənən bazarda bir təqvim ili ərzində buraxılan səhmlər emitentin nizamnamə kapitalının on faizindən az olan hissədə kütləvi təklif edildikdə;
investisiya qiymətli kağızları konvertasiya edildikdə;
investisiya qiymətli kağızlarının kütləvi təklifi nəzərdə tutulmadıqda.

Qeyd: Emissiya prospekti və ya informasiya memorandumu təsdiq edildiyi tarixdən bir il ərzində investisiya qiymətli kağızları tənzimlənən bazarda ticarətə buraxılmadıqda və ya onların kütləvi təklifi həyata keçirilmədikdə, emissiya prospekti və ya informasiya memorandumu qüvvədən düşmüş hesab edilir.

Emissiya prospektinə və informasiya memorandumuna dair tələblər “Emissiya prospekti və informasiya memorandumuna dair tələblər haqqında Qaydalar”la tənzimlənir.